ASPACE (Centro de Formación para a Prevención da Dependencia)
No ano 2016, un acordo entre a Fundación Amancio Ortega e ASPACE Coruña permitiu a creación do Centro de Formación para a Prevención da Dependencia, cuxo obxectivo é que os usuarios da entidade entren en contacto cos novas tecnoloxías dende o comezo da súa etapa escolar e experimenten a través delas unha aprendizaxe máis eficaz e dirixida ao fomento da autonomía na vida adulta.
O Centro de Formación conta con dispositivos tecnolóxicos (encerados interactivos, ordenadores, brazos articulados, controladores de mirada, proxectores, software deseñado para persoas con dificultades motoras, etc.) que traballan a estimulación sensorial e favorecen a participación dos usuarios en actividades de grupo.
Como extensión desta área educativa e comprendidos dentro do mesmo proxecto de colaboración coa Fundación Amancio Ortega, ASPACE creou tamén no seu centro residencial unha vivenda piloto domotizada para o adestramento dos usuarios adultos no uso da tecnoloxía para o fogar aplicada ás súas necesidades e un local social situado no centro de día.
A vivenda piloto conta con 56 metros cadrados distribuídos entre as áreas de cociña-salón e dormitorio-aseo e está totalmente equipada con electrodomésticos adaptados, sistemas de control remoto do entorno (persianas, luces e portas), baño accesible e cama motorizada, entre outros sistemas electrónicos. No tocante ao local social, é un espazo que inclúe unha recepción, unha cafetería e un punto de encontro para as familias atendido polos usuarios de ASPACE co obxectivo de fomentar as súas habilidades de comunicación e favorecer as relacións interpersoais.
Para lograr os Obxectivos de Desenvolvemento Sostible é fundamental garantir unha vida saudable e promover o benestar universal.
A educación é a base para mellorar a nosa vida e o desenvolvemento sostible. Ademais de mellorar a calidade de vida das persoas, o acceso á educación inclusiva e equitativa pode axudar a abastecer á poboación local coas ferramentas necesarias para desenvolver solucións innovadoras aos problemas máis grandes do mundo.
Desde hai tempo recoñécese que para conseguir unha economía robusta necesítanse investimentos en infraestrutura (transporte, regadío, enerxía, tecnoloxía da información e as comunicacións). Estas son fundamentais para lograr un desenvolvemento sostible, empoderar ás sociedades de numerosos países, fomentar unha maior estabilidade social e conseguir cidades máis resistentes ao cambio climático.
As cidades son fervedoiros de ideas, comercio, cultura, ciencia, produtividade, desenvolvemento social e moito máis. No mellor dos casos, as cidades permitiron ás persoas progresar social e economicamente. Nos últimos decenios, o mundo experimentou un crecemento urbano sen precedentes. En 2015, preto de 4.000 millóns de persoas vivían en cidades e prevese que ese número aumente ata uns 5.000 millóns para 2030. Necesítase mellorar, por tanto, a planificación e a xestión urbanas para que os espazos urbanos do mundo sexan máis inclusivos, seguros, resilientes e sostibles.